Voorspoedige 2009

Ek wens graag vir jou net die beste toe vir 2009!

Ek is die laaste tyd diep onder die indruk van "the power of now". Dat ons 
moet leef vir die oomblik, en nie in die toekoms of die verlede nie! 
Vanuit my oogpunt van "hierdie nou" wil ek graag die volgende met jou 
deel:
Ek weet nie wat jy oor die feestyd gedoen het nie - maar ek hoop jy kon 
rus. Ek is by my huis in Johannesburg - die lekkerste plek in die wêreld, 
veral weens Johannesburg se besondere aangename klimaat. Hierdie tyd van 
die jaar is dit besonders stil en geniet ek my tuin en die ryk voël-lewe. 
Ek ontspan en rus langs die swembad, kosbare "me time" wat ek terdee 
geniet.

Ek het die afgelope tyd baie bewus geword van een groot waarheid wat ek 
die nuwe jaar met my gaan invat - en dis "dankbaarheid" en "dit wat jy 
het moet jy oppas." Die afgelope 3 weke moet ek meer lê en slaap en rus 
as ooit omdat ek aan die begin van Desember verkeerdelik "cell-food" 
druppels in my regteroog gegooi het. Ek het nie mooi opgelet nie en het 
die klein botteltjie vir oogdruppels aangesien. Die druppel cell food, 'n 
sterk alkalie, het my kornea redelik beskadig. Volgens die oogarts, Dr 
Maria Nadj kon ek nie iets ergers in my oog gegooi het nie. Ek het groot 
geskrik, maar nou-ja wat kan ek sê - ek het dit aan myself gedoen en jy 
voel maar redelik "stupid".

My oog is darm nou al beter, alhoewel die sig nog nie heeltemal normaal is 
nie. Die prognose lyk positief - tyd gaan egter leer of daar permanente 
skade is maar ek glo dat dit heeltemal sal genees. Daarmee saam het ek ook 
te hard geoefen by my vroue gym "Curves" en my knie seergemaak. Ja, so wat 
is die uiteinde van my storie - Ek lê en kom die dr se voorskrifte na en 
rus my been en pas myself op. Ek besef net weer opnuut met dankbaarheid 
hoe geseënd ek is met 'n gesonde liggaam. As jy gesondheid het - het jy 
alles. . . .Daarom het ek besluit om een dingetjie in die nuwe jaar saam 
met my te vat: 'n "dankbaarbundel". Dit lê al klaar langs my bed en ek 
skryf elke aand voor ek gaan slaap ten minste 2 goed van die afgelope dag 
waarvoor ek dankbaar is neer. Dankbaarheid is vir my een van die boublokke 
van sukses!

So op die vooraand van 2009 wil ek vir jou los met die wyse woorde van een 
van die rykste mans in die wêreld - (net nie nou sy naam in my kop nie) 
Toe hulle vir hom vra wat sy geheim vir sukses is en wat sal hy graag nog 
sou wou doen as hy die geleentheid kry - was sy antwoord: "dankbaarheid - 
en dat hy graag meer foute sou wou maak".

Mag 2009 vir jou dit inhou, wat jy daarvan vra! Plaas jou vertroue in die 
Here, . . "dare to trust Him!" Ek doen.

Baie voorspoed en liefde.

Sonja